ഒരു അവധി കാലം 2
Oru Avadhikkalam Part 2 | Author : Manoharan
യാത്രയുടെ ക്ഷീണമോ, വയറു നിറച്ചു ഭക്ഷണം കഴിച്ച കൊണ്ടോ ഞാൻ നന്നായിട്ടു ഉറങ്ങി പോയി. ഉറങ്ങി എഴുന്നേറ്റപ്പോൾ അവിടെ അച്ഛമ്മയും സുമ ചേച്ചിയും മാത്രം ഉള്ളു. ഞാൻ എഴുനേറ്റ് പുറത്ത് വന്നപ്പോ അച്ഛമ്മ പുറത്ത് ഇരുന്ന് നാമം ചൊല്ലുകയായിരുന്നു. അച്ഛമ്മ നാമം ചൊല്ലിക്കൊണ്ട് ഇരിക്കെ എന്നോട് അടുത്ത് വന്നിരിക്കാൻ പറഞ്ഞു… അവിടെ ആയിരുന്നപ്പോൾ അമ്മ എന്നും നാമം ചൊല്ലും. ഞാനും ഇടയ്ക് അമ്മയുടെ കൂടെ പോയി നാമം ചൊല്ലാറുണ്ട്. അത് കൊണ്ട് തന്നെ നാമജപങ്ങൾ എനിക്ക് അറിയാമായിരുന്നു. അച്ഛമ്മയുടെ കൂടെ ഇരുന്ന് ഞാനും നാമം ചൊല്ലി
“നിനക്ക് ഇതൊക്കെ അറിയോ….? ”
“ആഹ് അമ്മ അവിടെ എന്നും നാമം ചൊല്ലാറുണ്ട് അച്ചമ്മേ. പറഞ്ഞിട്ട് എന്താ കാര്യം അമ്മയ്ക്ക് അവിടുത്തെ രീതികൾ ഒന്നും ഇഷ്ടല്ല.പരിഷ്കാരം ഒട്ടും ഭധിചിട്ടില്ല… ”
“അവളെ ഞാൻ മര്യാദക്ക് ഒന്ന് കണ്ടിട്ടില്ല. ഭാഗ്യം ആണ് എന്റെ മോന്റെ ഭാഗ്യം ആണ് ”
സ്വന്തം അമ്മയെ കുറിച്ച് നല്ലത് കേൾക്കാൻ ആഗ്രഹിക്കാത്ത മക്കൾ ഉണ്ടോ. അച്ഛമ്മയുടെ വാക്കുകളിൽ നിന്നും മനസിലായി അച്ഛമ്മയ്ക്ക് അമ്മയോട് ഉള്ള ദേഷ്യം ഒക്കെ മാറിയെന്നു
“അവരൊക്കെ എവിടെ അച്ഛമ്മേ…? ”
“അവരൊക്കെ പോയി മോളെ. കുട്ടികൾക്ക് നാളെ പഠിക്കാൻ പോണോലോ അത് കൊണ്ട് അവർ പോയി ”
“ശോ കഷ്ടം ആയി പോയല്ലോ ഞാൻ ഇവിടെ ഒക്കെ ചുറ്റി കറങ്ങി കാണാൻ ഒക്കെ വിചാരിച്ചതാ. ഇനിയിപ്പോ ഞാൻ എന്താ ചെയ്യാ അച്ചമ്മേ…? ”
“അതിനാണോ അപ്പൊ നീ ഇവിടെ വന്നത്… അപ്പൊ എന്റെ കൂടെ നിൽക്കാൻ അല്ലേ…? ”
“ഞാൻ അച്ഛമ്മടെ കൂടെ നിൽക്കുന്നുണ്ടല്ലോ.പിന്നെ എപ്പോളും വീട്ടിൽ തന്നെ ഇരുന്നാൽ ബോർ അടിക്കില്ലേ പിന്നെ അച്ഛൻ പറയാറുണ്ട് ഇവിടെ കണ്ടാലും കണ്ടാലും മതി വരില്ലാന്ന്… ”
“അത് ശെരിയ… നിനക്ക് പുറത്ത് പോകാൻ കൂട്ട് ഉണ്ടായാൽ പോരെ ശെരിയാക്കാം ”
“താങ്ക് യു അച്ചമ്മേ…. “”അച്ഛൻ സുഖമാണോ അവിടെ…? ”
“അച്ഛമ്മക്ക് അച്ഛനെ കാണണോ…? ”
“മരിക്കുന്നതിനു മുന്നേ അവനെ ഒന്ന് കാണണം.. ”
“അല്ല അച്ചമ്മേ ഇപ്പോ കാണണോ…? ”
“അതെങ്ങനെയാ അവൻ അവിടെയല്ലേ..? ”
“അച്ഛൻ ഇപ്പോ ഓഫീസിൽ ആയിരിക്കും. അവിടെ ഇപ്പൊ രാവിലെ ആണ് ഞാൻ വീഡിയോ കാൾ ചെയ്യാം അപ്പൊ കാണാൻ പറ്റും. മാത്രല്ല ഇവിടെ എത്തിയിട്ട് ഞാൻ അവരെ വിളിച്ചിട്ടില്ല”
“ഏഹ് രാവിലെയോ ദേവി…. അങ്ങനെ ആണോ…? ”
അകത്തു നിന്നും സുമ ചേച്ചി അത്ഭുതത്തോടെ ചോദിച്ചു കൊണ്ട് ഇറങ്ങി വന്നു
“ആഹ് ചേച്ചി ഇവിടെ രാത്രി അവിടെ പകലാണ്. ഭൂമി കറങ്ങുവല്ലേ ”
“ഉവ്വ് ഉവ്വ് നിക്കറിയാം. പണ്ട് പഠിച്ചത് ഓർമ ഉണ്ട് ”
ഇതൊന്നും ഒരു അത്ഭുതം അല്ല അവിടുത്തെയും ഇവിടുത്തെയും കാഴ്ച്ചകളും, സംസ്കാരവും എല്ലാം വ്യത്യസമാണ്. മാറാത്തതു ഒന്ന് മാത്രം എന്റെ അമ്മ. അന്നും ഇന്നും അങ്ങനെ തന്നെ ഒരു മാറ്റവും ഇല്ല. ഞാൻ അകത്തു പോയി ഫോൺ എടുത്ത് കൊണ്ട് വന്നു. വീഡിയോ കാൾ ചെയ്യാൻ തുടങ്ങി. പക്ഷെ അതിനു പറ്റുന്നില്ലായിരുന്നു.
എന്ത് പറ്റിയെന്നു മനസിലാവുന്നില്ല… ഞാൻ അച്ഛനെ കാൾ ചെയ്തു
“അച്ഛാ…. ഞാനാ അച്ഛാ ”
“ആഹ് ഞാൻ ഇപ്പൊ നിന്നെ പറ്റി വിചാരിച്ചുള്ളൂ. ”
“അച്ഛൻ ഓഫീസിൽ പോയില്ലേ ”
“ഇല്ല നീ പോയേ പിന്നെ ഇവിടെ ഒരാൾ സങ്കടത്തിലാണ്. അപ്പൊ ഞാനും കൂടി പോയാലോ. എന്തായാലും എനിക്കു ലീവ് ഉണ്ട്. ഒരു ആഴ്ച ലീവ് എടുത്തു ”
“ആഹാ ഞാൻ പോയ തക്കത്തിന് ലീവ് ഒക്കെ എടുത്ത് അടിച്ചു പൊളിക്കാൻ പോവാ രണ്ടുപേരും കൂടി കൊള്ളാട്ടോ ”
“ഒന്ന് പോടീ….. ”
“ആഹ് അച്ഛാ ഞാൻ വീഡിയോ കാൾ ചെയ്യാൻ നോക്കിയിട്ട് പറ്റണില്ല എന്താ ആവോ…? ”
“അവിടെ സിഗ്നൽ കിട്ടിലേരിക്കും. ഞാൻ അമ്മയക്ക് കൊടുക്കാം ”
“രാഖി നീ എന്തെടുക്കാ അവിടെ…? ”
“ഞാൻ അച്ചമ്മടെ കൂടെ നാമം ചൊല്ലേർന്നു അമ്മേ.. ”
“ആഹ് മിടുക്കി, നന്നായി അങ്ങനെ തന്നെ നിൽക്കുട്ടോ.അമ്മനെ കുറ്റം പറയിക്കരുത് മോൾ ”
“ഇല്ല അമ്മേ ഞാൻ ഇവിടെ നന്നായിട്ട് തന്നെ ഇരിക്കണേ…. നോക്ക് അമ്മ ഇവിടെ അച്ഛമ്മ എനിക്കു എണ്ണ ഇട്ട് കുളിപ്പിച്ചു, എന്ത് ഫ്രഷ്നെസ് ആണ് അമ്മേ ”
“അല്ലേലും ഞാൻ പറഞ്ഞാൽ നീ ചെയ്യില്ലലോ. നന്നായി അങ്ങനെ ഓരോന്ന് പഠിച്ചോ നീ “”പിന്നെ മിന്നു അമ്മു ആദി മാളു എല്ലാരും എന്ത് രസം ആണ് അമ്മേ…. ”
“നന്നായി എന്റെ കുട്ടി സന്തോഷായിട്ട് ഇരിക്കുട്ടാ ”
“ആഹ് അമ്മ ഞാൻ വയ്ക്കട്ടെ നാളെ വിളിക്കാട്ടോ ”
“ആഹ് ശെരി എന്നാൽ ”
ഞാൻ ഫോൺ കട്ട്‌ ചെയ്ത അച്ഛമ്മടെ അടുത്ത് പോയി ഇരുന്നു. അകത്തു സുമ ചേച്ചി രാത്രി ഭക്ഷണം ഉണ്ടാക്കാൻ ഉള്ള പരിപാടി ആണ്. എനിക്ക് അടുക്കളയിൽ പോയി നിൽക്കാൻ തോന്നി. സാധാരണ അടുക്കള വശതേക്ക് ഞാൻ പോകാറില്ല പക്ഷെ എന്തോ ഇവിടെ വന്നത് മുതൽ എനിക്കു ഞാൻ അറിയാതെ തന്നെ പല മാറ്റങ്ങൾ… ഞാൻ പതിയെ അകതെക്കു കയറി നാമം കഴിഞ്ഞാൽ പിന്നെ അച്ഛമ്മടെ പരിപാടി ടീവി കാണുന്നതാണ്.
“7 മണി മുതൽ ടീവി വച്ചാൽ എല്ലാ സീരിയലും കഴിയാതെ അമ്മ എണീക്കില്ല” സുമ ചേച്ചി അച്ഛമ്മയെ കളിയാക്കി കൊണ്ട് പറഞ്ഞു
“ഇത് എന്താ ഉണ്ടാക്കുന്നെ ”
“അച്ചിങ്ങ തോരൻ. ഉച്ചയ്ക്ക് ഉണ്ടാക്കിയ പുളിശ്ശേരി ഇരിപ്പുണ്ട്. ഇത് കഴിഞ്ഞു പപ്പടം കൂടി കാച്ചിയാൽ ഉഷാറാവും ”
സുമ ചേച്ചി പണ്ട് മുതൽ ഇവിടെ ഉള്ളതാണ്. ഇരു നിറം ഒട്ടും വണ്ണമില്ല.പുക പറ്റി മുഖം മുഴുവൻ വാടി ഇരിക്കുന്നു. എന്റെ അമ്മയുടെ പ്രായം കാണും ഇളയച്ഛന്മാർ ഇവിടുന്ന് മാറിയപ്പോ സുമ ചേച്ചിയും അച്ഛമ്മയും മാത്രം ആയി ഇവിടെ. ആൾ കാണുന്ന പോലെ ഒന്നുമല്ലട്ടോ നല്ല പാചകകാരിയാണ്. ആ സ്വാദ് ഇന്ന് ഉച്ചയ്ക്ക് ഞാൻ അറിഞ്ഞതുമാണ്.
“ഞാൻ അവിടെ അടുക്കളയിൽ ഒന്നും കേറില്ല. ഞാൻ എങ്ങാനും കേറിയാൽ അമ്മയ്ക്ക് അന്ന് ഇരട്ടി പണി ആയിരിക്കും. അത് കൊണ്ട് അമ്മ എന്നെ ആ വശത്തു അടുപ്പിക്കില്ല ”
“പെൺകുട്ടികൾ ആയാൽ പാചകം ഒക്കെ അറിഞ്ഞിരിക്കണം. മറ്റൊരു വീട്ടിലേക് കേറി ചെല്ലാൻ ഉള്ളതല്ലേ ”
ഓഹ് ഈ വാചകം അമ്മടെ സ്ഥിരം ഉള്ള ഡയലോഗ് ആണ്. ഈ പ്രായത്തിൽ ഉള്ള എല്ലാർക്കും പെൺകുട്ടികളെ കാണുമ്പോൾ ഇത് മാത്രേ പറയാൻ ഉള്ളോ ആവോ….?
“എനിക്ക് സുമ ചേച്ചി പാചകം പഠിപ്പിച്ചു തരോ..?
“അതിനു എന്താ സന്തോഷം ഉള്ളു. രാഖി മോൾക്ക് പാചകം പഠിപ്പിച്ചു കൊടുത്ത് എന്ന് എനിക്ക് പറയാലോ ”
സുമ ചേച്ചി എന്നെ കളിയാക്കികൊണ്ട് പറഞ്ഞു
ഭക്ഷണം കഴിച്ചിട്ട് ഞാൻ ഉറങ്ങാൻ പോയി. എനിക്ക് ഒട്ടും ഉറക്കം വരുന്നുണ്ടായില്ലാ. ഞാൻ എഴുനേറ്റു… അലമാരയിൽ നിന്നും അച്ഛന്റെ പഴയ പുസ്തകങ്ങൾ എടുത്തു. ഇംഗ്ലീഷും മലയാളവും ഒക്കെ ഉണ്ട്… അതിനിടയിൽ ഒരു ഡയറി കിട്ടി…. ആദ്യത്തെ പേജിൽ അച്ഛന്റെ പേരും വില്സവവും കൂടെ ഒരു കൊച്ചു റോസാപൂവിന്റെ ചിത്രവും…. അകത്തുള്ള പേജിൽ എല്ലാം അന്നന്നത്തെ കാര്യങ്ങൾ…. ഞാൻ ഓരോന്നായി വായിച്ചു കൊണ്ടിരുന്നു അതിൽ ഉള്ള എല്ലാ താളുകളിലും ആവർത്തിച്ച് വരുന്ന ഒരേ ഒരു പേര് ജയശ്രീ… ജയശ്രീ.അവരുടെ ഓരോ പ്രണയനിമിഷങ്ങൾ അച്ഛൻ കുറിച്ച് വച്ചിരിക്കുന്നു. ബുക്കിന്റെ ഇടയിൽ നിന്നും ഒരു മങ്ങിയ ഫോട്ടോ കിട്ടി. സുന്ദരി ആയ ഒരു പെൺകുട്ടി. രണ്ടു വശവും മുടി പിന്നിയിട്ട്, നെറ്റിയിൽ ഒരു ചെറിയ വട്ട പൊട്ടും നെറ്റിയിൽ ചന്ദനവും തൊട്ട്,ചിരിച്ചിരിക്കുന്നു… മറ്റാരാവാൻ എന്റെ അമ്മ തന്നെ. അമ്മയുടെ പഴയ ഒരു ഫോട്ടോ ആണ് അത്. അച്ഛന് പണ്ട് കൊടുത്തതാവും…
ഞാൻ ഫോട്ടോ കൈയിൽ എടുത്തു തിരിച്ചും മറിച്ചും നോക്കി അതിന്റെ പിന്നിൽ എന്തോ എഴുതിയിരിക്കുന്നു. “എന്റെ പ്രിയപ്പെട്ട രവിയേട്ടന് ”
“എന്റെ അമ്മേ വല്ലാത്തൊരു റൊമാൻസ് തന്നെ ”
ഞാൻ ഓരോ പുസ്തകങ്ങൾ നോക്കി കൊണ്ടിരുന്നു. പുറത്ത് നല്ല തണുപ്പുണ്ട്. അകലെ വയലിൽ വിളക്ക് കത്തിച്ചു വച്ചിരിക്കുന്നു.. മാവിന്റെ ഇടയിലൂടെ നക്ഷത്രങ്ങൾക് നടുവിൽ രാത്രിയിലെ വെളിച്ചത്തിനു വേണ്ടി ചന്ദ്രൻ തിളങ്ങി നിൽക്കുന്നു. പതിയെ ഞാൻ പുതച്ചു മൂടി കിടക്കാൻ തുടങ്ങി…. ശെരിക്കും എനിക്ക് ഈ മുറി ഒത്തിരി ഇഷ്ടമായി.നാളെ രാവിലെ തനിയെ എഴുന്നേൽക്കണം അച്ഛമ്മയ്ക് മുകളിലേക്കൊന്നും കയറാൻ പറ്റില്ല. കാലിനു വയ്യാണ്ട് ഇരിക്കുന്നതല്ലേ. പിന്നെ സുമ ചേച്ചിക്ക് അടുക്കളയിൽ ജോലി ഉണ്ടാകുമല്ലോ.അതെ അലാറം വയ്ക്കാം. ഞാൻ ഫോൺ എടുത്ത് അലാറം സെറ്റ് ചെയ്ത് ഉറങ്ങാൻ കിടന്നു.
***************************
രാവിലെ ഞാൻ എഴുന്നേറ്റത് എന്റെ ഫോൺ കാൾ കെട്ടിട്ടാണ്. ഞാൻ ഉറക്കം എഴുന്നേറ്റു മൊബൈൽ നോക്കിയപ്പോൾ വിളിക്കുന്നത് അമ്മയാണ്.
“ഹലോ അമ്മ. ഗുഡ് മോർണിംഗ് ”
“ഗുഡ് മോർണിംഗ് മോളെ… നീ എണീറ്റോ..? ”
“ഇല്ല അമ്മ. ഞാൻ എണീക്കാൻ അലാറം ഒക്കെ വച്ചിട്ടുണ്ടായി. പക്ഷെ അതിനു മുൻപേ അമ്മ വിളിച്ചു ”
“എന്നാൽ വേഗം എഴുന്നേറ്റു ചെല്ല്. അച്ഛമ്മ എഴുന്നേറ്റ് കുളിയൊക്കെ കഴിഞ്ഞ് ഇരിപ്പുണ്ടാകും ”
“ഇത്രയും നേരത്തെ എഴുനേക്കാനോ. എന്താ അമ്മേ ”
“അവിടെ അങ്ങനെയാ വേഗം പൊയ്ക്കോ. ഇല്ലെങ്കിൽ അച്ഛമ്മ ദേഷ്യപെടുട്ടോ ”
“ഹമ്മ് ശെരി. ഞാൻ പിന്നെ വിളിക്കാട്ടോ ”
“ആഹ് ശെരി ”
ഞാൻ മടിച്ചു മടിച്ചു എഴുന്നേറ്റു….. പുറത്ത് നല്ല തണുപ്പുണ്ട്. അമ്പലത്തിൽ മണിയടിക്കുന്ന ശബ്ദം
“നിർമ്മാല്യ പൂജ കഴിഞ്ഞു…. ”
അച്ഛമ്മ രാമായണം വായിക്കുന്നതിനിടെ പറഞ്ഞു. ഞാൻ പതുക്കെ അച്ഛമ്മയുടെ അടുത്തേക് പോയി.
“ആഹാ എഴുന്നേറ്റോ. ഇത്രയും നേരത്തെയൊക്കെ എഴുനേൽക്കോ നീയ് ”
“രാവിലെ തന്നെ അമ്മ വിളിച്ച് എഴുന്നേൽപ്പിച്ചു ”
“അത് നന്നായി വേഗം പോയി കുളിച്ചിട്ട് വരൂ. നമുക്ക് അമ്പലത്തിൽ പോയിട്ട് വരാം ”
ഈ തണുപ്പത് കുളിക്കാനോ.ദൈവമേ ഞാൻ എന്താ ചെയ്യാ….
“നോക്കി നിൽക്കണ്ട പോയി കുളിക്കാൻ നോക്ക് കുട്ട്യേ ”
ഞാൻ മുറിയിൽ പോയി ഡ്രസ്സ്‌ ഒക്കെ എടുത്തിട്ട് വന്നു. കുളിക്കാൻ ആയി കുളിമുറിയിലേക്ക് നടന്നു. സുമ ചേച്ചി കുളി കഴിഞ്ഞ് ഇറങ്ങിയിട്ടില്ല. ഞാൻ അവിടെ കാത്തു നിന്നു. നല്ല തണുപ്പ് ഉണ്ട്. അടുക്കളത്തിൽ തീയൊന്നും കത്തിച്ചിട്ടില്ല. അപ്പോ ഉറപ്പായി ഞാൻ ഇന്ന് തണുത്തവെള്ളത്തിൽ തന്നെ കുളിക്കണം. ഇവിടെ ഒരു വാട്ടർ ഹീറ്റർ പോലുമില്ല.
“വേഗം കുളിച്ചിട്ട് വരുട്ടോ….. അകത്തു തോർത്തും സോപ്പും ഒക്കെ ഉണ്ട് ”
“ചേച്ചി തണുത്ത വെള്ളത്തിൽ കുളിക്കണോ “.”ആഹ് പിന്നല്ലാതെ. രാവിലെ അമ്പലത്തിൽ പോയി വന്നിട്ടേ ഇവിടെ അടുപ്പ് കത്തിക്കുള്ളൂ. ”
“ഓഹ് എനിക്ക് വയ്യ തണുത്ത വെള്ളത്തിൽ കുളിക്കാൻ…. ”
“ആഹ് അതാണോ കാര്യം അതിനു ഒരു വഴിയിണ്ട് ”
“എന്താ….? ”
“കുളിക്കാൻ നേരത്ത് ഓം നമഃ ശിവായ എന്ന് പറഞ്ഞിട്ട് വെള്ളം ഒഴിച്ചാൽ മതി തണുക്കില്ല “
“ശെരിക്കും… തണുക്കില്ലേ. ”
“ഇല്ല മോളെ ഞാൻ ദിവസവും കുളിക്കണതല്ലേ.. ”
സുമ ചേച്ചി തന്ന ധൈര്യത്തിൽ ഞാൻ കുളിക്കാൻ തുടങ്ങി. വെള്ളം മേലെ വീണപ്പോ ഞാൻ അറിയാതെ തന്നെ ഓം നമഃ ശിവായ എന്ന് പറഞ്ഞു… സുമ ചേച്ചി പറഞ്ഞത് പോലെ എനിക്ക് തണുത്തതേയില്ല…. കുളി കഴിഞ്ഞ് ഞാൻ പുറത്ത് ഇറങ്ങി…. ഞാൻ ഇട്ടിരുന്ന ഡ്രസ്സ്‌ ഇപ്പോ കഴുകണോ അതോ പിന്നീട് കഴുകണോ….
“തുണിയൊക്കെ അവിടെ ഇട്ടേക്കു ”
കുറേ തുണികൾ കൂട്ടി ഇട്ടിരിക്കുന്ന ഒരിടം കാണിച്ചിട്ട് പറഞ്ഞു. ഞാൻ തുണിയെല്ലാം അവിടെ ഇട്ടു…
“കുളിച്ചപ്പോ തണുത്തോ നിനക്ക്…? ”
സുമ ചേച്ചി എന്നെ കളിയാക്കി കൊണ്ട് ചോദിച്ചു…
“ആദ്യം തണുത്തെങ്കിലും ഓം നമഃ ശിവായ പറഞ്ഞപ്പോ തണുത്തില്ല ”
“അഹ് അതാ ശിവന്റെ ശക്തി….
“വേഗം പോയി റെഡി ആയിട്ട് വാട്ടോ… ”
ഞാൻ റൂമിൽ കയറി റെഡി ആകാൻ തുടങ്ങി. അമ്പലത്തിൽ പോകാൻ അമ്മ സാധാരണ സാരി ആണ് ഉടുക്കാറുള്ളത്. എന്റെ കൈയിൽ സാരി ഇല്ല ഉണ്ടായാൽ തന്നെ ഉടുക്കാനും അറിയില്ല… വേണ്ട ഒരു സാഹസത്തിനു പോകണ്ട. ചുരിദാർ ഉണ്ട് അതിടാം…
ഞാൻ ഒരുങ്ങി ഉമ്മറത്തേക് വന്നു. അച്ഛമ്മ നേരത്തെ തന്നെ അവിടെ നിൽപ്പുണ്ടായി. ഞാൻ ഇറങ്ങി കഴിഞ്ഞ് സുമ ചേച്ചി വാതിൽ അടച്ചു
“നീ എന്താ മുടി കെട്ടാതെ വരുന്നേ…? ”
അച്ഛമ്മ അല്പം ദേഷ്യത്തോടെ ചോദിച്ചു
“ഞാൻ മുടി അങ്ങനെ കേട്ടറില്ല അച്ചമ്മേ… ”
“അമ്പലത്തിൽ പോകുമ്പോ മുടി അഴിച്ചിട്ടുടാ ”
ഇനി ഞാൻ മുകളിൽ പോയി മുടി കെട്ടേണ്ടി വരും. എന്താ ചെയ്യാ ഓരോരോ ആചാരങ്ങൾ.
“ഇങ്ങോട്ട് വരൂ ഞാൻ മുടി കെട്ടി തരാം ഇനി മുകളിലേക്ക് പോകണ്ട… ”
സുമ ചേച്ചി enne വിളിച്ച് അടുത്ത് നിർത്തി. രണ്ടു വശത്തു നിന്നും കുറച്ചു മുടിയെടുത്ത് നടുക്കായി കെട്ടി.
“ഇത് അഴിയോ സുമ ചേച്ചി,..? ”
“ഇത് അഴിയില്ല. ഞാൻ കെട്ടിയെക്കുന്നത് കണ്ടില്ലേ.,..? ”
“എന്നാൽ നമുക്ക് പോകാം സുമേ. നീ ആ വാതിൽ അടച്ചോളു “.”വാതിൽ ഇപ്പോളെ അടച്ചു അമ്മേ… ”
“ആഹ് എന്നാ നടക്കു….”
ഞാനും അച്ഛമ്മയും സുമ ചേച്ചിയും അമ്പലത്തിലേക്ക് നടന്നു…. മുന്നിലെ പാടം കടന്ന് ഒരു കുന്നിനു മുകളിൽ ആണ് അമ്പലം.
പടത്തിന്റെ അതിരിൽ കൂടി ഒരു നീർച്ചാൽ ഉണ്ടാക്കിയിരിക്കുന്നു. പാടത്തേക്കു വെള്ളം എടുക്കാൻ ആയിട്ടാണ് നീർച്ചാൽ ഉണ്ടാക്കിയിരിക്കുന്നത്.
“ഇവിടുത്തെ ദേവി ഉണ്ടാലോ ഭയങ്കര ശക്തിയാണ്. മനസ് അറിഞ്ഞു വിളിച്ചാൽ കേൾക്കും ദേവി നല്ലോണം പ്രാർത്ഥിച്ചോളണം ”
അച്ഛമ്മ അമ്പലത്തിലേക്ക് കയറുന്നതിന്റെ മുന്നേ പറഞ്ഞു ….
അമ്പലത്തിനു മുന്നിൽ ഒരു വല്യ ആൽമരം ഉണ്ട്.അവിടെ കുറേ ആളുകൾ ഒക്കെ ഇരിപ്പുണ്ട്. പണ്ട് അമ്മയെ കാണാൻ അച്ഛൻ വന്നിരുന്ന സ്ഥലമാണ്. ഇവിടെ സ്ത്രികൾ ദിവസവും അമ്പലത്തിൽ പോകും. അപ്പോൾ പിന്നെ അമ്മയും പോകാറുണ്ടാകുമല്ലോ…
അമ്മ പറഞ്ഞത് എനിക്ക് ഓർമ്മ വന്നു
“വൈകുന്നേരം തൊഴാൻ പോകുമ്പോള ഒരാൾ കോളേജ് കഴിഞ്ഞു വീട്ടിൽ പോലും പോകാതെ ആ ആൽമരത്തിന്റെ അവിടെ ഇരിപ്പുണ്ടാകും. കോളേജ് കഴിഞ്ഞു ക്ഷീണിച്ചു വരുന്നതല്ലേ എന്നാൽ വീട്ടിൽ പോയി വല്ലതും കഴിച്ചിട്ടൊക്കെ വന്നൂടെ…. അത് ചെയ്യില്ല. പിന്നെ ഞാൻ പുഷ്പാഞ്ജലി കഴിഞ്ഞ് കിട്ടുന്ന പഴവും അവിലുമൊക്കെ ആൽതറയിൽ വയ്ക്കും.ആരും കാണാതെ അത് രവിയേട്ടൻ എടുത്ത് കഴിക്കും. അത് കാണുമ്പോ മനസിന്‌ വല്ലാത്തൊരു സന്തോഷമാണ് ”
അച്ഛന്റെ ഇരിപ്പ്സ്ഥലം…… ഇവിടെ വരുമ്പോ ആൽമരം കാണാൻ വല്യ ആഗ്രഹം ആയിരുന്നു. അങ്ങനെ ഞാനും അച്ഛമ്മയും സുമ ചേച്ചിയും തൊഴാൻ കയറി.ഞങ്ങൾ അമ്പലത്തിലേക്ക് കടന്നു. വല്യ വാതിലുകൾ കടന്നു വേണം അമ്പലത്തിൽ കയറാൻ. അകത്തു ഉത്സവത്തിന്റെ നോട്ടീസ് വച്ചിട്ട് ഒരാൾ ഇരിപ്പുണ്ട്. തൊട്ടപ്പുറത്തു ഒരു വല്യമ്മ പൂമാല കെട്ടുന്നു. അമ്പലത്തിലെ ജോലിക്കാരിൽ ഒരാൾ ആ വല്യമ്മയെ മാല കെട്ടാൻ സഹായിക്കുന്നുണ്ട്. ഞങ്ങളെ കണ്ടപ്പോൾ ആ വല്യമ്മ ചിരിച്ചു…. മുന്നിൽ തന്നെ ഒരു മണ്ഡപം ആണ്. അതിന്റെ തൂണുകളിൽ എല്ലാം വിവിധ തരത്തിൽ ഉള്ള കൊത്തുപണികൾ ആണ്. മണ്ഡപത്തിനപ്പുറം ഒരു വല്യ വിളക്കും ഉണ്ട്. അച്ഛമ്മ അതിൽ എണ്ണ ഒഴിച്ചു.അകത്തു നിന്നും മന്ത്രങ്ങൾ കേൾക്കാം…. ശ്രീകോവിലിന് ചുറ്റും മതിൽ കെട്ടിയിട്ടുണ്ട്. അതിൽ എല്ലാം ചിരാത് വച്ചിരിക്കുന്നു. ശ്രീകോവിലിനു മുന്നിൽ ദീപങ്ങൾ തെളിയിച്ചു വച്ചിരിക്കുന്നു. അകത്തു ചന്ദനം ചാർത്തി, തെച്ചിപൂ മാലകൾ ഇട്ട്…. ചുവന്ന പട്ടുടുതു പുഞ്ചിരി വിടർത്തി പ്രസന്നവദനയായി നിൽക്കുന്ന ദേവി……. എന്താ ഭംഗി. ആ തേജസ്സ് എന്നെ വല്ലാതെ ആകർഷിച്ചു……. ശ്രീകോവിലിന്റെ ചുവരിൽ എല്ലാം വരച്ചിട്ടുണ്ട്… മ്യൂറൽ പെയിന്റിംഗ് ആണ്. ആയത് കൊണ്ട് എനിക്ക് ഒന്നും മനസിലായില്ല..
“അച്ചമ്മേ ഇത് എന്താ വരച്ചിട്ടിരിക്കണേ…? ”
“അത് പാർവതി സ്വയംവരം ആണ് ”
പക്ഷെ അത് പറഞ്ഞത് അച്ഛമ്മയോ സുമ ചേച്ചിയോ അല്ല ഒരു പുരുഷ ശബ്ദം. ആരാണ് എന്നറിയാൻ ഞൻ തിരിഞ്ഞു നോക്കി.
ഒരു വെളുത്തു മെലിഞ്ഞു പൊക്കമുള്ള ഒരു ചെറുപ്പക്കാരൻ. മുഖത്തു നല്ല ഐശ്വര്യം തോന്നികുന്ന ചിരി… നെറ്റിയിൽ ചന്ദന കുറി തൊട്ട്… ഞാൻ ചോദിച്ചതിന്റെ ഉത്തരം പറഞ്ഞു കൊണ്ട് ചിരിച്ചു ഞങ്ങളുടെ അടുത്തേക് വന്നു.
“പാർവതി സ്വയം വാരമാണ് ഈ വരച്ചിരിക്കുന്നത്…. ”
“പാർവതി മനസിലായി ….. സ്വയംവരം….? ”
“സ്വയംവരം എന്നാൽ കല്യാണം… സ്വന്തം ഇഷ്ട പ്രകാരം വരനെ തിരഞ്ഞെടുക്കുന്നു… ”
“ഓഹ് ശെരി ”
അല്ല ഇതാരാണ് ഇത്രേം വല്യ പുള്ളി. ഞാൻ ചോദിക്കാതെ തന്നെ ഇങ്ങോട്ട് വന്നിട്ട്, പറയാനും. “ഇതാരാ ലക്ഷ്മി അമ്മേ പുതിയൊരു ആൾ ”
ശ്രീകോവിലിന് അകത്തു നിന്നും ഒരു ശബ്ദം
“ഇത് രവിടെ മോളാണോ. പാരീസിൽ നിന്നും വന്നതാ ”
“ഉവ്വോ… ”
അമ്പലത്തിലെ പൂജാരി പുറത്തേക് ഇറങ്ങി വന്നു എന്നിട്ട് അർച്ചന തന്നു.
(തുടരും..)
No comments